又係时候来记录下最新的怀孕情况喇。
唔经唔觉，我已经踏入孕中期，汤圆亦都越长越大，已经唔係一个肚腩仔喇！！依家我自己企係度量腹围，已经有93CM，我妈妈话当年佢生我嗰阵，係98CM，唔知我会唔会超越妈妈嘅纪录呢？如果汤圆似佢老豆嘅话，就应该会好大只的，因为我老公当年出世係巨婴，8斤7两，仲要係顺产，真係佩服咗奶奶。
过咗头三个月，原来係真嘅孕吐嘅情况会无咗，胃口都好好，除非係特别腥嘅味道，如果唔係我都会接受到，食嘢情况比较正常，无之前咁偏食。亦都可能係咁，汤圆都大得快咗。但踏入孕中晚期，我觉得最烦就係我成日都要去厕所，可能係因为个BB大咗，压住咗我嘅膀胱，加上我之前检查嘅时候医生话我个肾功能一般，所以我去厕所嘅情况特别密。特别係晚上，一般我都要起3,4次身，加上有时隔离房嘅BB哭声，所以我睡眠质量就唔係几好。至于其它水肿啊，抽筋嘅情况就无出现过。体形方面，除咗个肚之外，其它手脚啊，甚至个胸都无变过。人地个个话会升CUP，我就升都唔升下，哈哈~~ 都好嘅，如果一直係肥胎唔肥人，咁到时生完都应该比较容易修身。依家体重係59KG，118斤，未怀孕之前係98斤，足足重咗20斤。呢20斤係晒个肚度，但我行起路上来都唔觉得有负担，一样健步如飞，可能係因为每日我都行好多路嘅缘故啦。反而我坐得耐同训得耐个人就会觉得唔舒服，行下就个人感觉舒服d。但我有d生过嘅朋友都话怀孕嘅时候好怕行，而且行得好论尽，我就无咁嘅感觉。
自从做咗第一次产检之后，我都未做第去做第二次，原因係医生叫我做完彩超再去检。我今次係主要讲下做彩超的情况俾大家听下，亦都希望大家少走冤枉路。我一共做咗两次免费彩超，一次係广医三院，另一次係海珠区第一人民医院。以下係我嘅亲身经历及对比。
(一)广医三院点评
由于我老公係天河区户口，因此我地可以拣去广医三院或者係华侨医院做免费的彩超排畸。因为华侨医院比较远，所以我地拣咗去广医三院，就係多宝路。我已经係提前咗一个月打电话预约，但原来预约係无咩作用的，去到一样要排队，排唔到你嘅就要等第二日，所以都唔明果个预约係咩作用。而且医生俾我地预约嘅电话又唔係广医三院的，係另外一个地方负责登记的。所以感觉好混乱。
彩超的时间係上午8点到12点，下午2点到5点，我地去到嘅时候係8点10分，问一楼咨询台的姑娘係边度照彩超，佢就叫我地去四楼。点知上到去四楼的姑娘，又话唔清楚，叫我地去三楼。去到三楼的姑娘又话要先到一楼服务台填表登记。哇，咩医院来的，个个都乱咁点。咁我地落到楼下一楼服务台，话係照免费筛查的彩超，果几个姑娘态度又差，一路讲笑都唔理我地，只係好唔愿意咁摞咗份表俾我叫我填，就係登记相关姓名啊，身份证啊，孕周等信息。填完之后就去挂号处挂号。好在我有带病历(全市通用)，咁就唔使另外买，挂号费4蚊，开一个诊疗卡。然后就去交费处记帐。去到交费处，出示天河区计生办俾我地嘅“转诊单”，咁样就唔使俾钱，只係记帐就得了。费用应该係广医三院问翻天河区摞钱的。打单出来显示係“中晚孕III级组，430蚊。”
之后我地就凭**同资料摞上去三楼B超室插单排队。哇，果度简直係超多人。而且位置就好少，好多孕妇都要企係度等，无位坐。佢排队分为三部份，係I级，II级同III级，然后果日做BC的医生竟然只有一个人，所以我后来竟然排左3个钟，差唔多12点先到我。好多人就排左成朝都排唔到，要下午再来过。
到我嘅时候已经係中午11点9，好在食左早餐，但都已经肚饿了。我同老公都好紧张，老公仲心跳加速添，因为佢好想知汤圆的健康情况，不过家属唔俾入去。当我入到BC室，係一个男医生负责做BC，一个姑娘负责输资料入电脑的。个医生照得好求其，全程都无同我有任何交谈，更加无俾屏幕我睇下BB的情况。而且一边帮我照，一边就同个姑娘讲订餐食饭的事，係度倾闲计。然后大概照左10几分钟就话照完。我都未着好鞋，另一个孕妇就已经俾个姑娘叫左入来照，准备训上床了。我问医生汤圆健唔健康，佢就答左句无咩问题。但就话照唔到BB块面。咁我话照唔到块面点办啊？佢话下次你来照的时候叫医生特别照清d咯。然后我问依家汤圆仲有无偏细，因为之前BC係话佢偏细2周左右。佢话依家大概係偏细一周到10天，不过係属于正常范围，因为我的经期係延迟10日左右。之后就唔得闲再理我了。
份报告的图片黑麻麻一挞挞，根本无BB的相，而且我见佢关于面部的描述，就写一句因胎位显示不清，咁就算了，根本就係不负责任。如果BB五官有咩问题，咁点办啊？咩叫排畸啊？就係要知道BB有无咩缺憾啊嘛。不过果阵已经12点几了，我同老公都无咩办法，只能翻屋企先。
后来我同老公越谂越唔对路，如果摞呢份报告去红会，肯定不被接受的，因为面部的数据都无，到时咪要自费係红会超一次？咁就最少都300几蚊啦。后来谂谂下，我係海珠区户口，我係海珠区都有一次免费的彩超，最近的就係海珠区妇幼，不过呢间嘢我同老公都唔中意去，因为服务态度好差。但想在悭钱，而又想清楚了解汤圆的健康情况的份上，于是我同老公决定下午去海珠区妇幼预约照彩超。
下午2点半，海珠区妇幼彩超先开门，我问d姑娘，呢个就指我去呢度，果个又指我去果度，总之态度就极差，同广医三院有得挥。好，我忍!后来去问到一个姑娘，佢话要先办诊疗卡，又话要填一堆资料，然后又要医生检查过开单我先可以做BC。哇，听落都觉得非常之烦。而且最重要係佢地的态度真係好差。所以我同老公最后决定先翻去广医三院问下个医生可唔可以照多次个BB的面部，因为我上网睇论坛同埋问妈群的朋友，佢地都话如果个BB拧转身照唔到，通常都可以再照过。而且早上嘅时候我见到係广医三院都有个女的照唔清，后来都入去再照过。于是我同老公决定去搏下，就搭车去翻广医三院。点知揾到今朝负责记录果个姑娘，佢恶死到咩咁，话照唔到係BB唔配合，唔係医生的责任，如果想再照过，就要重新交费，讲来讲去都係钱的问题，因为我地係做免费的，佢更加唔愿意理我地。哇，总之呢间就係黑店!!到最后，我同老公都放弃呢间嘢，决定翻屋企再从长计议。
俾大家睇下我係广医三院照到的彩超的图片，430蚊就係咁嘅效果。
(二)海珠区第一人民医院点评 其实免费的彩超宣传单建议係20-24做排畸，但一般22周因为BB的大小而异照得唔係好清楚，所以医生会建议24周去照，我两次照的时候都差唔多27周，自然照得更清楚，因为BB大个啊嘛~ 唔需要担心超过周期医生唔帮你照噶! 睇晒妈网的攻略之后，我同老公星期一早上就过去。其实间海珠区第一人民医院好易揾，就係万国广场后面，海珠状元坊对面。因为呢间医院係唔需要预约的，直接去就得了，所以我地都係提早d，8点几就去到。进入医院，首先係服务台(即係挂号果度) 办一张诊疗卡，记得带病历，双方身份证同海珠区的筛查申请表(如果有医保卡就带埋医保卡去)。完全唔需要挂号，1蚊都唔使俾。因为我係只做彩超，其它地贫抽血的项目我唔做，所以只需要我一个人办诊疗卡就得了，但如果双方都做，就要帮老公办埋诊疗卡。 办好诊疗卡后，就行去后座三楼。呢间医院分为前座同后座，前座就係挂号服务台果栋，后座就係交费果栋。上咗后座三楼转右手边直行到最尾，第二个护士站果度，你同姑娘讲话要做免费筛查，佢就会叫医生出来同你登记，医生会俾一份资料你填，都係相关姓名资料。如果只做彩超，其它就唔需要点填，医生亦都会好耐心咁教你同问你的相关情况。记得双方都要带身份证。之后医生就会开一张BC单俾你，然后摞落去一楼交费处记帐。係交费处果度有部机，你只需要按“产检优先”果项，基本上唔使等就会到你。你出示BC单同诊疗卡，交费处的人员就会帮你记帐。之后就上二楼照BC。 去到二楼，根本就无咩人，所以都唔使点等就到我。我问医生我老公可唔可以一齐入去，佢话今日因为有几个人都係做彩超，所以唔係几方便。(之前我睇妈网张贴，话人少的情况下老公可以跟埋入去睇)。医生的态度好好，帮我照嘅係个副主任，我问佢BB的五官睇唔睇到，因为我怕汤圆又唔乖，又拧转身照唔到块面。医生同我讲话照到，而且好清晰，佢话BB个鼻好大！我听到觉得好好笑，我话如果鼻大就似佢老豆了，我个鼻咁细。跟住估唔到医生仲转个屏幕俾我睇BB个样，仲指俾我睇边度係眼，鼻，嘴咁样。我问医生BB有无脐带绕颈，医生话无。之后医生就好细心咁帮我照，大概照左半个小时。一路我都无点出声，因为我都无咩问题想问，但我就感觉到医生好认真。 半个小时后终于照完，医生叫我出去等报告，好快报告就出咗，打印得好清晰，汤圆的五官睇得好清楚。因为听讲呢部BC机係新买的四维机，要二百几万，所以用四维机照出的三维图象就好清。呢间係老牌医院，我觉得从挂号处到交费处，护士到医生，全部都好好人，你唔识流程佢地教到你识。而且呢间医院无咩人去，所以基本上唔需要排队，嗰日夹埋我总共有三个人做筛查，个医生都话点解今日突然咁旺场了，哈哈！而海珠区妇幼免费的只係二维彩超，做三维要加60蚊，另外仲有30几蚊的检查费，感觉比较呃钱。 我叫大佬帮我扫描左张BC单，因为人地话呢张係BB的第一张写真，要好好保存，哈哈！ 一共两张相，都係大头相。一张正面，一张侧面
 彩超情况就介绍完毕喇，再讲下第二次做产检的情况先。 我摞住呢两次做BC的报告俾医生，医生都接受咗，然后都係做下d常规检查，例如量下个肚，测下胎音咁。第一次做产检汤圆的胎音係140，跟住两次BC，一次係138，一次係140，而今次的产检汤圆胎音係142，基本上心跳都无咩变化。做完常规检查，医生就开单叫我去做血糖筛查。我都好醒目，之前做好准备功夫。我上妈网睇过，做血糖筛查之前一晚8点钟后就不能进食，而且避免食糖份太高的食物，否则会影响结果。第二天亦都要空腹去。所以嗰一晚我无得食宵夜，搞到个肚好饿。所以第朝早我就好早去做产检，希望早d做完糖筛，唔使饿咁耐。 第二次产检费用一共係45.22元，其中自费只係0.98元，係葡萄糖粉的钱，但好激气嘅係，因为今个月之前间酒店帮我补缴过去一年的社保，搞到我依家嘅社保系统乱咗，交费嘅时候系统显示我不在参保状态。所以我最后就要自费交，好彩都可以用医保卡，而且费用唔多，先45蚊，如果唔係好似上次500几蚊，就麻烦了。但个收费处主管话我要尽快叫依家的人事部帮我搞翻好个系统，否则下次都係有影响。 交费后就去摞药处摞一包葡萄糖，50g的，然后去抽血果度开糖水饮，饮完后一小时内唔可以食嘢，饮水。之后就抽血。第二下午可以摞结果。医生话叫我唔使第日专门摞结果翻去，直接两周后来产检再摞结果翻去。结果我未摞，不过应该係正常，因为我怀孕咁耐都唔中意食甜嘢，所以我基本上无点食过甜嘢。如果糖筛唔过，就要做糖耐测试，咁就麻烦咯，好似要抽四次血，饮几次葡萄糖水。之前阿嫂好似就係做糖筛前一晚食左碗糖水，所以第日做糖筛测试时就唔过关，要做糖耐，所以大家日后做呢个测试时就要注意了。 好喇，再pose下近期的相俾大家睇下啦! 28周正面!
侧面，好明显汤圆变紧汤圆王!哈哈
谢谢各位收睇，哈哈!! 下个月我准备影孕照喇!哈哈!
[ 本帖最后由 袁夫人 于 2011-3-6 12:37 编辑 ]
| 
发表于 2011-1-1 20:22
距做的唔系胎监啊，胎监系孕后期先做噶！监测住BB的胎动，同心跳，就叫胎监，距做的同你一样，都系拿部机系肚度稳胎心听啊，正常来讲，胎心其实系9周都有啦，只系声音听起来无禁清晰。
