28周后到32周期间，我产检过两次，30周的产检只係常规检查，就是听下胎心音，同埋量下腹围宫高。到32周，我的腹围係96CM，宫高係27CM，照计来讲个肚都唔算细。然后医生开咗一张B超单，呢次B超係要确定BB胎位，心脏功能，胎盘成熟度，脐流血功能以及羊水等情况。原本以为预约照B超要第日再来照，但当时姑娘话依家可以照，咁肯定就嗱嗱声今日照埋了。 係B超室外等咗一阵就到我，28周照B超的时候一切正常，点知今次就激死我了，汤圆好曳，竟然脐带绕颈2周。唉，呢个百厌星，好玩唔玩，摞脐带来玩。跟住其它胎位，羊水都正常。但个医生照汤圆的心脏照左好耐，后来又话叫我出去行一阵，再翻来照多次个心脏。 之后我就係门口行左几个圈，都有大半个钟，果阵都已经上午11点几了，后来个医生带咗我去另外一个室，揾咗另外一个男医生一齐照汤圆个心脏，原来呢个女医生有好多嘢都睇得唔清，呢个男医生可能係高级少少的，就係度同佢讲呢度点照嗰度点照。个女医生不时发出好多疑问，后来都俾个男医生解释清楚，过程之中吓到我啊，以为汤圆个心脏有问题添，原来係个女医生自己唔识睇。不过都好，起码佢自己唔识肯问人，如果唔係就真係一旧云咁了！而且今次照，我实际孕周係32周＋，但照出来汤圆只有29周＋，即係偏细咗3周左右，唉，点解条友仔食极都咁细粒噶！ 汤圆仲好曳添，医生一路照B超，个B超探头碌到去边，汤圆就用只手仔脚仔顶住个探头推上来，好似唔俾人地压住佢咁，鬼马到死。我望住个肚皮突下突下咁，都唔知好嬲定好笑。 之后医生终于照完，我问医生个BB有无咩问题，佢话就係脐带绕颈2周，其它都无咩问题，叫我到时摞翻份报告俾我产检嘅医生睇。但因为当时已经中午12点几，所以我就同老公翻咗屋企先了。 翻到屋企，妈妈同爸爸话叫我下午摞份报告去俾医生睇，问清楚安心d，于是下午我就食完饭再去过。网上的人又话我汤圆偏细咁多要住院打营养素，吓到我咩咁。我的好朋友见到我的微博，叫我唔好担心陪咗我去医院，后来我地俾咗报告产检的医生，医生只係好轻松咁同我讲话BB好百厌，玩脐带，佢话36周再照一次B超，希望到时佢自己会玩翻条脐带出来，如果到时只係绕一圈，都可以试下俾我顺产，如果到时都係绕两圈，咁就只能剖腹了。然后医生俾左份表我，叫我每日数胎动，每日三次，每次一小时。胎动係监测BB係肚入面有无缺氧，如果一小时内少于3次或者大于20次，就表示佢缺氧，就需要即刻去医院。到时下次产检带埋呢份表俾医生睇。依家我每日都数胎动，基本上每小时都係7－10次胎动左右，都几正常，不过数胎动係一个好漫长的过程，要先排清膀胱，左侧训係张床度静心数。每次数一个小时。 另外我问医生BB偏细的情况，医生话BB係细左小小，不过呢个唔係好紧要，食多d肉就得了。我的好朋友就教我饮多d瘦肉水同鸡汤，会有帮助，因为果阵佢BB都有试过偏细的情况出现，后来BB出世竟然係8斤几，佢仲一直安慰我叫我唔使担心。 其实我自己对BB偏细方面就唔算太担心，因为本来我经期就一向唔准，二来我自己出世的时候都好轻，只係对脐带绕颈呢样比较忧，唉，唔通真係要剖腹？点解28周果阵仲咁乖，32周就唔乖噶！汤圆真係唔锡妈咪了。医生都话脐带绕颈其实係同BB比较好动有关。今次嘅产检一共係206蚊，生育险全部出晒，自己只係俾4蚊挂号费。 到咗32周，我都係无抽筋嘅情况出现，原先仲以为自己係果种唔会水肿嘅人，点知话音刚落，就发现自己手指同脚都开始肿了。手指原先嘅婚戒固然戴唔到，连平时戴中指都松的钻戒，家戴无名指也很紧了。脚都开始肿了，妈妈话，三肿三消，就预示着BB要出世了。
附上32周的孕照，正面的我
个样就无影了，因为我发现我个样有d变咗，块面多左粒粒，皮肤又差晒，唔知係咪怀孕之后无用护肤品，总之好似好粗糙咁。仲有就係。。。我觉得我个鼻无拉拉变大左，好丑样啊。老公都承认我个鼻变大左小小。唉！！！希望生完可以恢复翻啦，鼻尖就话靓姐，鼻大好肉酸噶嘛。
侧面的我
我打算今个星期去影孕照喇，之前团咗一个，到时影完上传俾大家下我无遮无掩嘅大肚肚啦！哈哈
[ 本帖最后由 袁夫人 于 2011-4-25 20:08 编辑 ]
| 
发表于 2011-3-23 16:30
